Stofnanir

Eftirlit með heilbrigðisþjónustu, þjónusta við almenning í tengslum við heilbrigðismál og/eða sjúkra- og slysatryggingar og forvarnir í heilbrigðismálum eru á hendi stofnana sem starfa samkvæmt lögum og reglugerðum þar um og undir yfirstjórn heilbrigðisráðherra.

Geislavarnir ríkisins

Geislavarnir ríkisins starfa undir yfirstjórn heilbrigðisráðherra samkvæmt lögum nr. 44/2002 um geislavarnir og samkvæmt reglugerðum um geislavarnir sem settar hafa verið með stoð í lögunum. Helsta hlutverk stofnunarinnar snýr að öryggisráðstöfunum gegn geislun frá geislavirkum efnum og geislatækjum, leyfisveitingum vegna geislavirkra efna, mati á áhættu við notkun geislunar og eftirliti með geislatækjum og geislavirkum efnum.

Forstöðumaður Geislavarna ríkisins er Sigurður M. Magnússon.

Heyrnar- og talmeinastöð Íslands

Heyrnar- og talmeinastöð Íslands starfar samkvæmt lögum nr. 42/2007 um Heyrnar- og talmeinastöð og er undir yfirstjórn heilbrigðisráðherra. Helsta hlutverk Heyrnar- og talmeinastöðvar er að annast þjónustu við heyrnarlausa, heyrnarskerta og þá sem eru með heyrnar- og talmein. Stöðin annast heyrnarmælinar, þjálfun og endurhæfingu heyrnarskertra og sinnir forvörnum á starfssviði sínu í samvinnu við aðrar stofnanir eftir því sem við á. Stöðin útvegar einnig hjálpartæki og veitir fræðslu og þjálfun í notkun þeirra, auk þess sem rannsóknir og fræðsla á starfsviði heyrnar- og talmeina eru meðal verkefna Heyrnar- og talmeinastöðvar.

Framkvæmdastjóri Heyrnar- og talmeinastöðvar Íslands er Guðrún Gísladóttir.

Landlæknisembættið

Embætti landlæknis starfar samkvæmt lögum nr. 41/2007 um landlækni undir yfirstjórn heilbrigðisráðherra með það að markmiði að tryggja gæði heilbrigðisþjónustu og stuðla að heilbrigði landsmanna. Hlutverk landlæknis eru m.a. að veita ráðgjöf um heilbrigðismál og að hafa eftirlit með heilbrigðisþjónustu, heilbrigðisstarfsmönnum og lyfjaávísunum. Landlækni ber einnig að safna og vinna upplýsingar um heilsufar og heilbrigðisþjónustu, fylgjast með heilbrigði landsmanna og að vinna að gæðaþróun innan heilbrigðisþjónustunnar. Auk þess sinnir landlæknir kvörtunum almennings vegna heilbrigðisþjónustu, stuðlar að rannsóknum og því að menntun heilbrigðisstarfsmanna sé í samræmi við kröfur heilbrigðisþjónustunnar á hverjum tíma.

Landlæknir er Geir Gunnlaugsson og aðstoðarlandlæknir Matthías Halldórsson.

Lyfjagreiðslunefnd

Samkvæmt 43. gr. Lyfjalaga nr. 93/1994 skipar heilbrigðisráðherra fimm manna nefnd, lyfjagreiðslunefnd til fjögurra ára í senn og skal nefndin skipuð fagmönnum á sviði læknisfræði, lyfjafræði og fjármála. Lyfjagreiðslunefnd samkvæmt lyfjalögum og reglugerð nr. 213/2005 um lyfjagreiðslunefnd og ákvarðar hámarksverð á lyfseðilsskyldum lyfjum og dýralyfjum. Nefndin tekur einnig ákvörðun um greiðsluþáttöku sjúkratrygginga í lyfjum sem eru á markaði, greiðsluþátttökuverð og greiðsluþátttöku í lyfjum sem veitt hefur verið undanþága fyrir. Lyfjagreiðslunefnd raðar samheitalyfjum og lyfjum með sambærileg meðferðaráhrif í viðmiðunarverðflokka til ákvörðunar um greiðsluþátttöku almannatrygginga og annast útgáfu lyfjaverðskrár þar sem birt er hámarksverð og greiðsluþátttökuverð lyfseðilsskyldra lyfja og allra dýralyfja.

Formaður Lyfjagreiðslunefndar er Rúna Hauksdóttir Hvannberg.

Lyfjastofnun

Starfsemi Lyfjastofnunar byggir á 2. gr. Lyfjalaga nr. 93/1994 og er stofnunin undir yfirstjórn heilbrigðisráðherra. Hlutverk Lyfjastofnunar eru m.a. útgáfa, breyting, niðurfelling og afturköllun markaðsleyfa lyfja, útgáfa leyfa til lyfjarannsókna og afgreiðsla umsókna um leyfi til innflutnings og sölu lyfja sem ekki hafa markaðsleyfi hér á landi. Skráning aukaverkana lyfja, faglegt eftirlit með innflutningi lyfja og með starfsemi lyfjabúða og lyfjaheildverslana sem og eftirlit með lyfjaauglýsingum eru einnig meðal verkefna sem leyst eru í Lyfjastofnun. Stofnunin hefur reglubundið eftirlit með lyfsöluleyfishöfum, lyfjasölum lækna, lyfjasölum sveitarfélaga, lyfjagerðum, lyfjaheildsölum, lyfjaumboðsfyrirtækjum, dýralæknum, heilbrigðisstofnunum, sjúkrahúsum, heilsugæslustöðvum og læknastöðfum og greiða þessir aðila árlegt eftirlitsgjald til stofnunarinnar.

Forstjóri Lyfjastofnunar er Rannveig Gunnarsdóttir.

Lýðheilsustöð

Lýðheilsustöð starfar samkvæmt lögum nr. 18/2003 um Lýðheilsustöð og er undir yfirstjórn heilbrigðisráðherra. Hlutverk stöðvarinnar er að efla lýðheilsustarf og samræma það, annast fræðslu til almennings um heilbrigði og heilsueflingu í samstarfi og samvinnu við landlækni og fleiri eftir því sem við á. Meðal helstu verkefna Lýðheilsustöðvar eru forvarnir á sviðum áfengis- og vímuvarna, manneldis, slysavarna og tóbaksvarna. Auk þess ber Lýðheilsustöð að kynna nýja þekkingu og reynslu sem nýtist í lýðheilsustarfi, meta árangur lýðheilsustarfs, efla þekkingu, miðla upplýsingum og fræðslu og efla kennslu og rannsóknir á sviði lýðheilsu. Innan Lýðheilsustöðvar starfar landsnefnd ásamt sérfræðiráðum samkvæmt lögum um Lýðheilsustöð og reglugerð nr. 571/2004 um landsnefnd og sérfræðiráð Lýðheilsustöðvar.

Forstjóri Lýðheilsustöðvar er Margrét Björnsdóttir.

Sjúkratryggingar Íslands

Sjúkratryggingar Íslands annast framkvæmd sjúkratrygginga og semur um og greiðir endurgjald fyrir heilbrigðisþjónustu. Stofnunin starfar undir yfirstjórn heilbrigðisráðherra samkvæmt lögum nr. 112/2008 um sjúkratryggingar. Heilbrigðisráðherra skipar fimm menn í stjórn stofnunarinnar skv. lögunum, og jafnmarga menn til vara. Sjúkratryggingar Íslands annast framkvæmd sjúkratrygginga, semur um heilbrigðisþjónustu og annast kaup á þeim vörum og þjónustu sem stofnuninni ber að veita. Stofnunin greiðir endurgjald fyrir heilbrigðisþjónsutu sem veita ber samkvæmt lögum um heilbrigðisþjónustu eða samið hefur verið um og hefur auk þess eftirlit með gæðum og árangri starfsemi þeirra sem veita heilbrigðisþjónustu samkvæmt samningum. Sjúkratryggingar Íslands skulu með reglubundnum hætti birta glöggar upplýsingar um alla starfsemi sína og kynna almenningi rétt sinn samkvæmt lögum nr. 112/2008 um sjúkratryggingar.

Forstjóri Sjúkratrygginga Íslands er Steingrímur Ari Arason.

Vísindasiðanefnd

Samkvæmt reglugerð nr. 286/2008 um vísindarannsóknir á heilbrigðissviði skipar heilbrigðisráðherra sjö manna nefnd Vísindasiðanefnd, til að fjalla um vísindarannsóknir á heilbrigðissviði. Nefndin starfar undir yfirstjórn heilbrigðisráðherra skal hún meta samstarfsverkefni, fjölþjóðlegar rannsóknir, klínískar lyfjarannsóknir samkvæmt ákvæðum reglugerðar nr. 442/2004 um klínískar lyfjarannsóknir á mönnum og aðrar áætlanir um vísindarannsónir á heilbrigðissviði. Vísindasiðanefnd skal einnig taka þátt í almennri og fræðilegri umræðu á vettvangi lífsiðfræði og birta leiðbeinandi álit um viðfangsefni á verksviði nefndarinnar. Beiðnir um mat á vísindarannsókn skulu sendar skrifstofu nefndarinnar ásamt nákvæmri rannsóknaáætlun og öðrum gögnum samkvæmt starfsháttum Vísindasiðanefndar.

Formaður nefndarinnar er Björn Rúnar Lúðvíksson og framkvæmdastjóri er Eiríkur Baldursson.

• Stofnanir á sviði heilbrigðisþjónustu (listi með heimilisföngum)
• Útgefið efni
• Lög og reglugerðir